Un dai elements plui impuartants par scrivi ben par furlan doprant il computer al è chel de tastiere. I furlans a scuegnin in gjenar scrivi parsore di une tastiere taliane, che e va benon pe lenghe taliane, cun dutis lis letaris comudis di digjitâ. Ma cuant che si vûl scrivi alc te marilenghe, si scuvierç che al mancje un mût svelt par scrivi i acents circonflès e tancj si rangjin doprant acents sbaliâts o grafiis aprossimativis. La soluzion miôr e je invezit chê di doprâ une mape de tastiere (o layout par dîle par inglês) personalizade. Chest al permet di associâ une cumbinazion di tascj, se pussibil facil di visâsi, di fracâ intal stes moment par scrivi la letare juste. I layouts di tastiere a son tancj, a seconde de lenghe e dal paîs: par esempli in Canadà si ‘nt dopre un che al lasse scrivi sei par inglês che par francês cence fadie. Tornant al furlan, par fortune cualchi volontari al à creât pai principâls sistemis operatîfs mapis comudis pe nestre lenghe.
WINDOWS
timp: 5 minûts, dificoltât basse
Cence instalâ nuie, in Windows si puedin scrivi lis letaris cui acents cjalcjant insiemi Alt e un numar de tastierute numeriche (par esempli, “â” al corispuint Alt+131, ae direzion http://bit.ly/f53FTx si cjatin dutis lis cumbinazions). Ancje se chest mût al è simpri valit, cul timp a son vignudis fûr soluzions plui naturâls par digjitâ chestis letaris.
La vie plui svelte e je chê di discjamâ la tastiere furlane di www.cfl2000.net e seguî lis istruzions: une volte fat dut, si podarà scrivi une vocâl cu l’acent circonflès fracant il tast AltGr e la letare desiderade, mentri par vêle maiuscule, si fracarà AltGr, Shift e la vocâl. Il program al à ancje un piçul jutori che al presente lis variis cumbinazions.
Une mape alternative e je chê che a dopre i tascj clamâts “muarts” parcè che no son doprâts par solit: te tastiere taliane al è l’acent circonfles parsore de letare “ì”, par cui daspò vê instalât il file disponibil su http://bit.ly/i5V0lZ a seconde de version di Windows in ûs, pe vocâl cu l’acent circonflês o fracarìn Shift, “ì” e la vocâl.
MAC OS
timp di preparazion: un nie. dificoltât: nissune
Se cui sgarfadôrs furlans la cjase dal miluç no jere metude tant ben, pe tastiere e va un grum miôr, parcè che nol covente zontâ nuie par scrivi i acents, ma si pues seguî chestis istruzions a seconde de tastiere che o vin.
VECJE TASTIERE: fracâ “shift” (il tast in bas a çampe cu la freçute viers l’alt), po il tast dulà che al è il “^” e la letare di fâ. A son problemuts cu lis maiusculis.
GNOVE TASTIERE: cricâ “alt” e po dopo il tast dulà che al è il “^” e la letare. Al funzione ben ancje cu lis maiusculis.
LINUX
timp: 0-10 minûts, dificoltât nissune/medie
Su dutis lis version modernis di chest sisteme operatîf libar si pues daurman scomençâ a scrivi ben par furlan fracant insiemi AltGr,il tast Shift, po chel dulà che al è il “^”, molâ dut e duncje cjalcjâ la letare che o vês di fâ. Cheste soluzion no je sveltonone, par cui cumbinazions plui curtis si puedin cjatâ su http://bit.ly/idTiOK, ancje se si scuen meti in cont di sgarfâ un ninin cui files di sisteme.
Andrea Decorte
A ducj chei che i tegnin a la identitât e ai derits dal Popul Furlan
Lis elezions scozesis a son stadis di pôc, cu la vitorie dal SNP (Scottish National Party) che al à concuistât la maiorance asolude tal Parlament (te foto in bande, la aule). Une curiositât a proposit dal Parlament Scozês (fat bon di resint intal 2003) e je che il 
Par une volte no us segnalìn un alc di digjitâl, ma dal mont “reâl”: il Comun di Glemone al da acet ae presentazion dal numar di Mai dal mensîl “La Patrie dal Friûl”, lunis ai 30 di Mai aes 20.30, te ex glesie di Sant Michêl. Ducj a son invidâts, si podarà sore nuie vê l’ultim numar de Patrie di cerce e si podarà fâ l’abonament a presit promozionâl
Voleiso savê ce timp che al fasarà doman in te Regjon Friûl – Vignesie Julie?
Furlans, digjitait furlan! 